Musikalgalla med Austrheim Songlag

Eit fyrverkeri av ei førestilling med profesjonelle musikarar, stort sceneshow, lyd, lys, effektar, dyktige solistar og eit stort samstemt kor i vårt svar på West End, eit gallapynta Austrheim Samfunnshus. Sjølvsagt vert det rød løpar. Me presenterer utdrag frå Les Misérables, Miss Saigon, Phantom of the Opera, Mamma Mia, Hamilton, The Greatest Showman, The Book of Mormon, A Star i Born og Cats.

Det vert sal frå bar før forestillinga, i pausen og etter forestillinga. Aldersgrense 18 år. 

Pris: vaksne kr. 395,- .

Ledsager med gyldig ledsagerbevis kommer gratis inn.

Austrheim Songlag

Austrheim Songlag høyrer heime i Austrheim Kommune, og me er i dag 60 dedikerte medlemmar mellom 18 og 80 år. Me har eit svært variert program og eit allsidig repertoar, og det gjer koret vårt til et spennande kor å være med i. Me har eit inkluderande miljø der alle kan trivast og utvikle seg musikalsk.  Austrheim Songlag er ein viktig del av kulturlivet og kultilbodet i ein liten kommune som Austrheim. Dei siste åra har me og fått tilhengjarar frå andre stader i Nordhordland som til dømes Radøy, Lindås og Knarvik.

Dirigent: Elisabeth Jensen Risnes

Elisabeth Jensen Risnes tok over som dirigent  for Austrheim Songlag i 2021.

Ho er ein engasjert og inspirerande dirigent, og ho har satt sitt eige preg på koret dei siste åra. Ho er utdanna pianist og musikkpedagog frå Griegakademiet i Bergen (2000), og har sidan 2001 arbeidd i Austrheim Kommune. Ho er i dag leiar for kulturskulen i kommunen, og i 2024 vart ho velfortent tildelt Kulturprisen i Austrheim for sitt arbeid og engasjement i musikkmiljøet i Austrheim, inkludert Tiriltunge barnekor og Austrheim Songlag, Austrheim Skulekorps for å nemne noko.

Tangentar: Lyder Stefan Minde Janøy

Lyder kommer frå Skien, men er busett i Austrheim. Han har studert ved Berklee College of Music, og er utdanna jazzpianist. Han jobbar nå som klipper og animator for Mothership, og har jobba i fleire produksjonsselskap med film og animasjon.

Gitar: Jon Martin Skauge

Jon Martin Skauge er ein lokal musikar frå Hodneland i Alver, men som og er anerkjent i musikkmiljøet i Noreg. Han er gitarist, komponist, arrangør, lærar, musikkprodusent og lydteknikar. Han har produsert musikk til mange dokumentarfilmar på NRK og TV2, og har arbeidd med mange kjente artistar som mellom andre Rune Larsen, Tor Endresen og Alexander Rybak. Han har gitt ut fire eigne album.

Bass: Torstein Mongstad

Torstein Mongstad kjem frå Solund, og han er for tida fast bassist i bandet Askeladden. Askeladden kjem med nytt album i januar 2025. Han har gått på Kongshaug musikkgymnas, er utdanna lærar, og arbeider til dagleg som lærar.

Slagverk: Tor Bjarne Bjelland

Tor Bjarne Bjelland er frå Kvinnherad, men er busett i Bergen. Han har utdanning frå Jazzlinja ved Trondheim musikkonservatorium, og har jobba som profesjonell trommeslagar sidan 1999. Han har spelt live og i studio med eit stort utval av norske, kjente artistar, mellom andre Jan Eggum, Sissel Kyrkjebø, Trang Fødsel, Vinni, Marion Ravn, Herborg Kråkevik og Ylvis. Han har i ei årrekke vore med på ulike teaterproduksjonar på Den Nasjonale Scene og Trøndelag teater, og på tv har han vore fast trommeslagar på «I kveld med Ylvis», «Radioredaksjonen» og ulike andre NRK-produksjonar.

Saksofon: Jan Kåre Hystad

Jan Kåre «Hysen» Hystad er en kjent norsk jazzmusiker frå Stord, men er no busett i Austrheim. Hystad er klassisk utdanna ved Griegakademiet, og siden 1978 bosett i Bergen der han har vore frilans musikar. Han har spelt i mange store oppsetningar ved teater og scene, og samarbeidd med mange kjente musikarar som til dømes Jan Eggum, Kaizers Orchestra m.fl. Han har sjølv utgitt fleire eigne album.

Fløyte: Kari Tresnes

Kari Tresnes er ein lokal fløytist med bakgrunn i Austrheim Skulekorps. Ho er mykje brukt på ulike kulturelle tilstellingar i Austrheim Kommune. Ho har spelt for Austrheim Songlag på mange ulike førestillingar og konsertar gjennom ei årrekke. Til dagleg arbeider ho ved biblioteket i Austrheim Kommune.

Aldersgrense 18 år.